冷冷的海風，吹向冷冷的土地，
吹著冷冷的鹿耳門。
聽講世紀之毒號做「戴奧辛」，
已經偷偷滯佇咱的土地、滯佇咱的溪底，
聽講魚、蝦攏有毒！咱的血嘛有毒！
風吹、風吹天頂飛，阿媽的心天頂飛。
吳信阿媽講：我長期綴阮翁、查某孫滯佇台鹼蓄水池邊，
靠抓蓄水池，魚、蝦過生活，
老的五月走矣，查某孫才九歲，
以前政府無講過，佇這抓的魚、蝦攏有毒，
即碼講這附近嘛攏有毒， 使閣佇這捉魚，
講我身軀底流的血，「戴奧辛」含量全台灣上蓋懸。

媽祖啊！
我是不是頂世人，或是，這世人做了無夠好？
目屎一直底流，冷冷的風吹乾阿媽的目屎。


風吹、風吹天頂飛，媽媽的心天頂飛。
楊阿姨講：阮翁已經死二十外冬矣，
我佇竹筏仔港溪抓魚二十外冬，
養飼6個囡仔；
現此時查某囝嘛已經嫁人，
不過..大漢後生一直滯佇「仁愛之家」，
細漢囝最近出車禍摔斷跤佇厝靜養，
政府講竹筏仔港溪 使閣抓魚，

媽祖啊！
汝看我卜安怎過日？
目屎一直底流，冷冷的風吹乾阿姨的目屎。

風吹、風吹天頂飛，阿媽的心天頂飛。
悲傷的人規工靜靜躺佇床頂，
冷冷的海風，吹著冷冷的土地，
風真大，棉被愛蓋予燒，
陳喊阿嬤講：自我嫁來這，就去台鹼做臨時工，
幫忙摃水銀槽，幫忙製造「五氯酚」，
即碼規身軀病，開過七擺刀，
一粒目睭已經無看，面、腹肚攏腫大，
一隻跤嘛無去矣，
恁看我甘有親像一個人？

媽祖啊！
為怎樣我哪會才呢歹命？
我攏夢到我行佇田岸邊，行佇草埔地。
目屎一直底流，冷冷的風吹乾阿媽的目屎。

風吹、風吹天頂飛，媽媽的心天頂飛。
小翠一個查某囝國小六年、一個查某囝國小一年，
乳癌擴散到骨癌，每個月攏愛去做化療。
消瘦的面、消弱的身軀。
拍拼做加工，拍拼放鬆心情，
因為小翠講：伊愛堅強活落去。

媽祖啊！
汝真正要保庇，
保庇我身體健康，保庇阮查某囝緊大漢，
目屎一直底流，冷冷的風吹乾小翠的目屎。
冷冷的海風，吹向冷冷的土地，
吹著冷冷的鹿耳門。

媽祖啊！
汝真正愛保庇，
保庇咱的故鄉、保庇咱的鹿耳門。